اولدی عاشورا گونی کرب بلا دارالبلا
شعر ترکیاولدی عاشورا گونی کرب بلا دارالبلا
نقش اولوب شمشیر عشقه البلاء ِللولا
لشگر حق فرقه کفریله اولدی روبرو
اولدی آماده ولا اهلی ایچه جام بلا
بیر طرف یئتمیش ایکی عاشق وصاله انتظار
بیر طرف مینلر نفر پیمان شکن اهل جفا
بیر طرفده سامریلر حقی تکفیر ائیلییور
بیر طرف موسای حقّه نیزه سی اولموش عصا
صبح آچیلدی روز عاشورا اوجالدی های و هو
ال اله وئرمیشدی دیو و دد سلیمانی ییخا
تشنه لب لر باده وصلیله سرمست اولدولار
کئچدیلر جاندان رکاب عشقیده اهل وفا
کیم سوار مرکب عشق اولدی چاتدی مقصده
ذلّته باش اگمیین لر دوشدی باشسیز توپراقا
گوندریب قربانلارین لب تشنه میدانه خلیل
کربلا اولدی ذبیح اعظم عشقه منا
وئردی حتی دینه قربان صودامر سربازینی
قالدی تک میدانیده اول خامس آلعبا
نور حق هر قدر جلوه ائله دی کفر اهلینه
خوشلیوب ناری ائدیب لر نور عزت دن ابا
یاره لی شیری حصاره سالدیلار روباه لر
اولمادی بیر دادخواهی تاپدی جرات اشقیا
هر نقدری سسلدی سلطان دین انصارینی
اولمادی ممکن جوابین رد ائده بیر آشنا
هر طرف دن اوستونه حمله ائدیب زاغ و زغن
کیم سالیب فرصت اله وردی او مظلومه یارا
هر نفس چکدوقجا سو تک قان وئروردی یاره سی
پیکرینده یاره لر خندانی دی باشدان باشا
مژده وصلی گتوردی یاریدن بیر اوچ پر اوخ
قاصد یاره اورکده یئر وئریب اول مقتدا
اوخ اورک بندین قیریب گئتدی اورکدن طاقتی
ماسواللهی آتیب گوزدن اولوب مست لقا
باشلادی مقتلده شوقیله نماز عشقینی
سجده گاه عشقیده یوز قویدی قانلی توپراقا
باش یارا، پیکر یارا ،سجاده قان، محرابی قان
ورد و ذکری دیلده یاهو عشقیده اولموش فنا
عشقه باخ ،معشوقه باخ، بزم وصال یاره باخ
دیلده یاهو شوق وصلیله ائدیر ذوق و صفا
عرض ائدیب یارب رضایم هر بلا و محنته
امروون تسلیمییم ای خالق ارض و سما
سجده دن باش قالخیزیب بیر دفعه ده ائتسین قیام
اولمادی امکان آلیب جسمین قوجاقه کربلا
قانی آخدیقجا بدن دن سلب اولوبدی طاقتی
مرغ روحی چرپینیردی جسیمدن اولسون رها
کامه چاتدی اهل کین عالم دوشوب دی لرزیه
الده خنجر مقتله ساری گلیب شمر دغا
گلدی زینب آخرین دیدارینه قارداشینین
باشدا معجر، گوزده اشکی، قلبیده شور و نوا
باخدی بیر گوداله ، باخدی بیر یارالی قارداشا
گوردی قانه غرق اولوب بحر بلاده ناخدا
گوردی جان اوسته یارالی قارداشی مخمور عشق
سسلدی بیر آچ گوزون زینب سنه اولسون فدا
شدت غمدن جالاندی صبرینین پیمانه سی
تاپمادی چاره بلا توپراقینی سپدی باشا
شمر ال آتدی خنجره تار اولدی دنیانین گوزی
حضرت زهرا یوموب گوز یاسه باتیب دی ماسوا
باشدا اول سرعتیله محکم ائتدی معجرین
دوتدی شمرین خنجریندن دختر شیر خدا
قیل مجسم خاطرینده، ال یالین ،خنجر یالین
باجی زینب، شمر قاتل ، ایش یئتیشدی گور هارا
یوخ نیازی شرح ائدم قالدی نحاله اللری
قان قاریشدی قانه آز قالدی اولا محشر بپا
چاره سی سدّ اولدی هر یئردن توکوب گوزیاشینی
یوز دوتوبدی یثربه سسلندی گل داده آنا
گل آنا باخ زینبین احوالینه اقبالینه
حاصل عمرون نئجه گور ظلمیله اولدی فنا
ائیله سو حاضر آنا لب تشنه مهمانون گلور
آزقالیر کی زینبین بو چولده قارداشیز قالا
آچدی گوز بو کشمکشده شاه مظلومان حسین
دعوت ائتدی زینبی صبره امیر ماسوا
آغلاما زینب بلورسن یوخ بو احواله دوزوم
تز قییت اخیامه ال اوز مندن ای کان وفا
قوی منی قانیله سیراب ائله سین شمشیرلر
تا بو قانیله جهان دا دین حق تاپسین بقا
محنتین چوخدور نظام صبریوی پوزما هله
آغلاما مندن صورا باشین چکر چوخ ابتلا
آه و زارائتمه بلالی عرصه ده محکم دایان
سرپرست ائتدیم سنی بو چولده یورقون قیزلارا
من گرک قران یولوندا باش و جانیمدن گئچه م
وار بیوک تکلیف بوینومدا کرگ اولسون ادا
سنده صبر ائیله قاباقدا محنت شامات وار
قلبیمی آه شرر باریله بئیله داغلاما
بو شهادت دور هله رنج اسارت وار باجی
سرنوشتینده یازیب، درد و بلا، کلک قضا
آغلاما سن آغلاسان کیم قیزلارین نازین چکر
ناله ائتمه اولما راضی دشمن دین شاد اولا
تز قییت اخیامه ایندی اولدورر قیزلار اوزون
وئر تسلی قویما قیزلاریم ائده آه و نوا
بیر نفر یوخ خیمه لرده قیزلاری آرام ائده
آغلاییر نازلی رقییم سسلنیر ایوای بابا
قارداشین امرین باجی ناچار اطاعت ائیله دی
گلدی اما آز قالیب روحی بدن دن آیریلا
ناگهان گوردی کی دگدی نظم عالم بیر بیره
قاره یئل اسدی گییندی عالم امکان قرا
بیر زمان گوردی حسینین باشی چیخدی نیزیه
گوییا چیخدی قرانلوق بیر گیجه شمس هدا
جلوه رخسارینی رویت ائدیب سرنیزده
سسلدی قارداش یارالی باشیوه جانیم فدا
ای امیدیم تکیه گاهیم باخ جدادن بیر منه
زینبه تاب و توان وئر قویما صبریم قورتارا
کامه چاتدین سن شهادتله یئتشیدن مقصده
زینبین قالدی کمک سیز یوخ داخی بیرآشنا
راحت اول قارداش باجین ثابت قدم عهدینده وار
قویمارام تا جان دا جان وار بو آخان قانلار باتا
لشگریم قیزلار، سلاحیم گوزیاشی، آهیم سپر
ظاهری قدرت لری زینب کرگ ائتسین فنا
کاخ استبدادی قولباقلی گرک فتح ائیلییه م
سن قوتولدون زینبه باشلاندی تازه ماجرا
تا نفس وار نسگلین یاده سالیب دیل داغلارام
اولمادی بیر کس اولا یاور پیمبر اوغلونا
سن بیلرسن ائیلیر مدهوش محشردن هراس
ای کرامت صاحبی احسان ائله روز جزا
محمد هوشمند
فهرست اشعار:
