ای خدا گوندر بو عصرین صاحبین

شعر ترکی

ای خدا گوندر بو عصرین صاحبین
حجت حق لیل قدرین صاحبین
.
ای خدا آرام جانیم هاردادی
مونسیم روح و روانیم هاردادی
.
دوندی گونلر هفته لر آیلار ایله
قالدی گوزلر یولدا یارب رحم ایله
.
غصه دن خسته اورک دینجلمدی
یوسف زهرای اطهر گلمدی
.
جمعه جمعه عومروموز چاتدی باشا
جام صبریم آز قالیر دگسین داشا
.
هاردادیر اهل ولانین دلبری
دین و قرآنین حقیقی رهبری
.
بس هاچان باشه چاتار بو اینتظار
قالمادی یارب اورکلرده قرار
.
روز و شب ذکریم اولوبدور الامان
هارداسان گل داده یا صاحب زمان
.
آز قالیر اولسون گلستانلار خزان
هارداسان ای باغ دینه باغبان
.
هارداسان ای درده درمان هارداسان
سن گلن یوللاره قربان هارداسان
.
هارداسان هجرینده دیل لر قان اولوب
بو جهان عاشقلره زندان اولوب
.
قالمیب رحم و مروّتدن اثر
یوخ داخی عشق و صداقتدن خبر
.
یئر اوزی مکر و خیانتلن دولوب
هاردا حق وار ظلمیله پامال اولوب
.
دولدوروب ریب و ریا محفل لری
حب دنیا مست ائدیب غافل لری
.
دسترس ده اولدی اسباب گناه
عمروموز اولدی گناهیله تباه
.
آز قالیر تعطیل اولا احکام دین
شیعه نی درک ائله ای حبل المتین
.
پس هاچان باشه یئته ر غیبت آقا
گل گتیر انسانلارا عزت آقا
.
ابر غیبتده داخی اولما نهان
گل صفا تاپسین جمالیندن جهان
.
ای صراط حقه میزان هارداسان
محیی احکام قران هارداسان
.
هارداسان ای درده درمان هارداسان
سن گلن یوللاره قربان هارداسان
.
گل دولوب ظولمیله دنیای دنی
سسلییور امداده مظلوم لار سنی
.
ظلمده طغیان ائدیر اهل جفا
هر گون عاشورادی هر یئر کربلا
.
مدعی چوخدور ولی یوخدی محک
حقیدن چوخ باطله واردیر کمک
.
تا جهان وار دولتین پاینده دی
عالمین چشم امیدی سنده دی
.
هارداسان ای داغلی دیللر مرهمی
گل اوزون قورتار بلادن عالمی
.
اذن آل ای منتقم داداریدن
آل حسینین قانینی اشراریدن
.
وارث آل پیمبر هارداسان
ای جمالی حقه مظهر هارداسان
.
هارداسان ای درده درمان هارداسان
سن گلن یوللاره قوربان هارداسان
.
هارداسان ای اولیانین عزتی
اهل ایمانین وقار و شوکتی
.
جان فدا اوچ یوز اون اوچ یولداشیوه
گل بیزی ائیله تصدق باشیوه
.
تشنه جام صداقت دیر جهان
یول گوزتلیر منتظر لر ناگران
.
عومروموز قورتاردی حسرتده آقا
قالمیشوق صحرای غربتده اقا
.
غرق اولوبدی شبهه ده اهل جهان
گل اوزون وئر حق یولون خلقه نشان
.
بحر غمده قالمیشوخ آواره گل
درد الیندن اولموشوخ بیچاره گل
.
عالمین شور و صفاسی سنده دی
هر چتین دردین دواسی سنده دی
.
قالدی غربتده ولا اهلی آقا
سن اوزون تعجیلیوه ائیله دعا
.
ای ایشقلی ماه تابان هارداسان
کشور عشقه سلیمان هارداسان
.
هارداسان ای درده درمان هارداسان
گل گلن یوللاره قوربان هارداسان

محمد هوشمند